2010/11/30

ماتزعليش

.. ماتزعليــــش



عاشق فـ ليلَة..
والليلة ضلمة..
حبال طويلة..
والاسم حكمة..
والحلم مالـُه .. دمُّه فـ إيديا ؟!
و الوِحدة قاعدة تضحك عليا
وانا لا مذنب ولا ضحية
ولا كل مرة بتوضى بنسى
متوضي أهو بس فجري يرسى
لنفس أمارة بالبحور
يقيم فنارة ويمد نور
مابين حروف اسمي .. واسمك إيه ؟
ماتزعليش ..
الفرق إيه مادام نصيب
ماتجيبي قلبـِك يبات حبيب
ويصحى  يلعب معايا تاني
لعبة "حبيبي ولاّ انت جاني؟ "
وانا لو حمَل هاحِب ديب
هاحبه و ان كلْني ده ذنبي
مين اللي يرضى ياكل حبيب !
وصدقينى ده طبع قلبي
..
ضروري أحبِّك قصاد عينيا
وانساكي لما تغيبي فيكي
لأنك انتي اللي اعرفها هي
البنت ساعة ماشوف عينيكي
..
وانتي و بعيدة
واحدة وحيدة
عِش تايه من الرموش
او حزن صرف من غير رتوش
او سعادة او الجنون
او اللي الحايرة بين العيون
او اللي مش عارفة بعيد عني تكون
اشوفها قبل ما تشوفني هي
اسألها هو انتي اسمك ايه؟
ومايهمنيش
ساعتها قصدي اسألها تانى
انتي الحبيبة ولا انتي جانى
تيجى مكاني
..
الفجر يمكن ما يناديش
عليا وينور عشاني
بس انتظاره - ماتزعليش-
علمني درس مايتنسيش
إن الطيور محتاجه ريش
واسمك بجد .. ما يهمنيش

ليست هناك تعليقات: